Endurhæfingardeild Heilbrigðisstofnunarinnar Ísafjarðarbæ hefur fengið tækjabúnað að gjöf frá ýmsum aðilum.
Minningarsjóður FSÍ um Úlf Gunnarsson yfirlækni gaf stuttbylgjutæki sem er öflugt tæki til meðhöndlunar á meðal annars gigt og stoðkerfisvandamálum. Tækið er mjög fullkomið og þægilegt í notkun og er með innbyggðum meðferðum fyrir sjúkdómsgreiningar innan sjúkraþjálfunar.
Þjálfunarhjól og stóll frá Oddfellowstúkunni Gesti á Ísafirði. Á hjólinu er hægt að æfa bæði hendur og fætur. Innbyggð tölva er í hjólinu og mælir hve mikið er tekið á með hvorum fæti, vegalengd, tíma og fleira. Einnig tekur hjólið við og hjólar ef einstaklingur hefur ekki kraft til að hjóla sjálfur.
Tog-tæki, gjöf frá Verkalýðsfélagi Vestfjarða.
Þetta er tæki sem er með stafrænum stillingum og leysir af hólmi gamalt togtæki sem notað hefur verið síðan deildin opnaði. Nýja tækið er í alla staði mun þægilegra í notkun bæði fyrir sjúklinginn og sjúkraþjálfarann og gefur fleiri möguleika í meðferð en gamla tækið.
Þess má geta að í ár eru 20 ár síðan Endurhæfingardeildin opnaði á neðstu hæð Sjúkrahússins, en hún var áður staðsett á rishæðinni í gamla sjúkrahúsinu.
Höf.:SÞG