Ársskýrsla 2022

Árið 2022 byrjaði með miklum fjölda smita af omikron-afbrigðinu og litaðist starfsemin af því fram á vor.

Frá haustinu 2022 hefur stór hluti læknaliðsins verið danskur, auk þess sem við höfum haft í starfsliðinu hjúkrunarfræðinga frá ýmsum löndum. Þetta er ánægjuleg viðbót við starfsliðið, sem annars hefði ekki getað staðið undir verkefnunum. Þó tungumálaörðugleikar geti í einhverjum tilvikum verið til trafala hefur samstarfið gengið glettilega vel.

Umbótaverkefni héldu áfram á ýmsum sviðum. Eins og uppgjör árangursvísanna sem fylgir þessari ársskýrslu ber með sér hefur margt gengið eins og að var stefnt en annað síður, eins og gengur. Í ár er síðasta ár sem unnið er skv. stefnu 2020–23 og því mun þurfa í lok ársins að gera nýja stefnu þar sem lærdómur verður dreginn af þessu og ný stefna mörkuð í samhengi við breytt ástand og breyttar áherslur stjórnvalda.

Fjármál stofnunarinnar samhliða þeim eðlilegu kröfum sem gerðar eru til starfseminnar hafa verið áskorun. Áður en fjáraukalög og aðrar tilfærslur komu til stefndi reksturinn í halla vel á þriðju hundrað milljónir. Sérstaklega reiknast okkur til að hjúkrunarrýmin séu vanfjármögnuð. Hjúkrunarheimili á samningi við Sjúkratryggingar Íslands fengu í fyrra verulega leiðréttingu en enn er ekki búið að reikna til enda hvernig slík leiðrétting kæmi út fyrir ríkisrekin hjúkrunarheimili.

Enn heldur einkunn stofnunarinnar í könnun um Stofnun ársins áfram að hækka og annað árið í röð er stofnunin í efsta sæti meðal systurstofnana. Með ánægðu starfsfólki getur Heilbrigðisstofnun Vestfjarða áfram sinnt sínu hlutverki sem lykilstofnun í vestfirsku samfélagi.

Gylfi Ólafsson forstjóri

Í stefnu stofnunarinnar sem sett var fyrir árins 2020–23 voru settir fram árangursvísar í tveimur köflum, helstu árangarsvísar og aðrir ítarlegri.

Árangursvísar af þessu tagi eru vandmeðfarin verkfæri. Þeir þurfa að mæla eitthvað sem raunverulega skiptir máli (helst að það sé beintengt markmiðum stofnunarinnar í heild), að það sé auðvelt að safna þeim, að þeir skapi ekki ranga hvata og mæli það sem þeim er ætlað að mæla. Þá er til lítils að mæla atriði sem ekki eru í valdi stofnunarinnar að breyta. Markmið þarf að setja þannig að þau séu samtímis metnaðarfull en einnig að þeim sé hægt að ná.

Þá breytist heimurinn frá því að árangursvísir er settur fram og þangað til hann er gerður upp. Sum gögn eru ekki lengur til, áherslur um annað breytast.

Í heilbrigðisþjónustu er margt þeim annmarka háð að erfitt er að mæla raunverulega þjónustu. Árangursvísar af þessu tagi verða því gjarnan ytri mælikvarðar; mælikvarðar á umbúnað og umsýslu ýmisskonar en ekki kjarnastarfsemina sjálfa.

Nú eru árangursvísar gerðir upp í annað sinn. Niðurstaðan er að fjórir náðust, tveir náðust ekki og þrír náðust að talsverðu leyti eða skilgreiningaratriði hvort þeir náðust.

Rafvæðing ferla hefur gengið talsvert, og eru reikningar til dæmis ekki lengur sendir í pósti nema í undantekningatilvikum. Árangurinn hefur hinsvegar ekki verið jafn hraður og markmiðin gerðu ráð fyrir.

RAI-gæðavísar eru nánast innan marka. Virkni stofnunarinnar við dreifingu upplýsinga hefur verið góð, bæði á heimasíðu og Facebook sem reynst hefur þægilegasti vettvangurinn. Græn skref náðust ekki með formlegum hætti, en mörg skref voru tekin í þá átt á ýmsum sviðum.

Starfsánægja er skv. markmiðum, en innleiðing árlegra starfsmannasamtala hefur ekki gengið sem skildi. Upplýsingagjöf innanhúss með virkri notkun Workplace hefur gengið með ágætum.

Samkvæmt ársskýrslu var örlítill afgangur af rekstri, en það er vegna afar stórrar aukafjárveitingar í lok árs, svo þar er settur gulur litur.

Ítarlegri árangursvísarnir, sem upprunalega áttu eingöngu að vera fyrir innanhússbrúk, urðu 14 grænir, ellefu rauðir og einn gulur.

Í græna flokkinn setjum við þjónustukannanir, þar sem við höllum okkur þó að öllu leyti upp að könnunum sem gerðar eru á landsvísu á vegum Sjúkratrygginga Íslands og fjármála- og efnahagsráðuneytisins.

Atvikaskráning hefur gengið vel, inflúensubólusetning hjá áhættuhópum, bólusetningar barna, upplýsingar á vef á erlendum málum, bætt aðgengi á heimasíðu og grænt bókhald sem gert var í fyrsta skipti 2022. Þá setjum við starfsmannafundi grænu megin, því þó þeir séu ekki alveg fullt eins margir og markmið sögðu til um hefur upplýsingagjöfin verið stöðug innanhúss.

Stórt verkefni um bætta skjalavörslu, með innleiðingu á rafræna málakerfinu MAFS, skilaði tveimur þroskastigum eins og þau eru skilgreind hjá Þjóðskjalasafninu. Svarhlutfall í Stofnun ársins var með ágætum, veikindahlutfallið innan marka, enginn óútskýrður launamunur, og bragarbót gerð í áætlanagerð.

Gulur litur er settur á fjölda starfsmanna með of háa orlofsinneign, þar sem verulegt átak lækkaði töluna úr 57 í 13.

Rauður litur er settur á fjölda byltna, lyfjamistök og árlega yfirferð lyfjalista. Skoða þarf sérstaklega hvað er til bragðs að taka hér.

Skráning blóðþrýstings minnkaði eftir að hafa verið mjög góð árið 2021, en fjármögnunarkerfi heilsugæslunnar hefur einnig breyst og ekki jafn mikil áhersla lögð á þetta. Biðtími eftir þjónustu sálfræðings var enn of hár, en afar mikil þjónustubót hefur orðið á síðustu misserum í allri geðheilbrigðisþjónustu með tveimur geðteymum, málastjórum, far- og fjarsálfræðingum og ýmsu öðru. RAI-mat hefur ekki verið tekið upp í heimahjúkrun eða hjúkrunarheimili á Patreksfirði, en hefur verið tekið upp annarsstaðar.

Samráðsgátt starfsmanna hefur ekki náð flugi þó samráð eigi sér stað helst á starfsmanna- og stjórnendafundum, auk óformlegri leiða. Fundir fagráðs hafa fallið niður vegna fjarveru og mannabreytinga. Starfsmannavelta var lítillega hærri en vonir stóðu til um. Hjólavottunarverkefni var sett á ís. Bólusetningar starfsmanna samkvæmt verklagsreglum voru settar í gang af fullum krafti í ársbyrjun 2023, en fá rauðan punkt fyrir 2022.

Smásaga frá heimahjúkrun

Á árinu var tekið upp forritið Smásaga. Forritið gerir starfsfólki heimahjúkrunar kleift að skipuleggja flókinn dag innlita og skrá jafn óðum ástand og aðgerðir. Kerfið er beintengt sjúkraskrárkerfinu Sögu. Með þessu hættir tvíverknaður við að skrifa nótur á staðnum og færa þær svo inn í sjúkraskrárkerfið að degi loknum.